Plantun de Prouvènço

Pèr coumpara dos planto d'encò nostre

Helianthemum canum & Aegilops cylindrica

Helianthemum canum

Cistaceae

Noms en français : Hélianthème blanc, Hélianthème des chiens.

Descripcioun :
Aquesto massugueto di flour jauno trachis dins la garrigo e li relarg roucassous. Li fueio an ges d'estipulo. Pèr la destria de Helianthemum italicum fau bèn regarda lou dessouto di fueio qu'èi blanc que i'a un mouloun de péu estela (fotò). Au contro Helianthemum italicum a pas jamai de péu estela. Coumpara emé la massugueto-d'Itàli e peréu lis àutri massugueto di flour jauno.

Usanço :
Li massugueto èron acampado en Espagno pèr la farmacìo tradiciounalo e soun couneigudo pèr lucha contro li microbe (poulifenòu).

Port : Pichoto planto lignouso
Taio : 5 à 30 cm
Fueio : alterno
Tipe bioulougico : Camefite
Cicle bioulougico : Planto renadivo

Gènre : Helianthemum
Famiho : Cistaceae

Ordre : Malvales

Coulour de la flour : Jauno
Petalo : 5
Ø (o loungour) flour : 8 à 16 cm
Flourido : Printèms

Sòu : Ca
Autour basso e auto : 0 à 2200 m
Aparado : Noun
Mai à jun

Liò : Garrigo - Roucaio - Tepiero seco
Estànci : Termoumediterran à Aupen
Couroulougi : Éurimediterranenco
Ref. sc. : Helianthemum canum (L.) Baumg., 1816 (= Helianthemum oelandicum subsp. incanum (Willk.) G.López, 1992 )

Blad-dóu-diable(-di-long)

Aegilops cylindrica

Poaceae Graminaceae

Nom en français : Égilope cylindrique.

Descripcioun :
Aquéu blad-dóu-diable vèn de Turquìo e se pòu trouba d'eici d'eila dins li champ e lis escoumbre. Aleva noste relarg d'auto Prouvènço èi pulèu rare. Se recounèis à sa longo espigo que fai uno meno de cilindre de 4 mm de diamètre. Lis arèsto di glumo e di lemma soun courteto à la baso e loungarudo au soumet de l'espigo. Coumpara amé Aegilops ventricosa que ié sèmblo, mai que lis espigueto soun pu redouno.

Usanço :
Li blad-dóu-diable soun proche dis àvi fèr de nòsti blad cultiva. Soun adounc bon à manja, mai sara un pau long pèr n'en acampa li grano. Èron acampa en Sicilo à passa tèms.